Besa në derbi, në Kavajë duan arbitër me përvojë

Rikthehet sërish derbi mes kavajasve dhe rrogozhinasve. Javën e ardhshme kavajasit do të presin Egnatian, që i mori plot 4 pikë në dy fazat e para. Për humbjen e fundit në kampin kavajas pati jo pak kontestime dhe kjo e detyron Mërgjyshin që të kërkojë arbitër me përvojë.

Para sfidës, trajneri i mirënjohur ka folur për “Rtshsport”, duke theksuar se: “E thashë edhe më lart që do të presim Egnatian në datën 10 prill, që është rivali ynë kryesor në grup. Gjykimi ndikoi në humbjen tonë të fundit, ndaj shpresoj që FSHF të caktojë një gjyqtar me përvojë për të ruajtur bukurinë e takimit”

“Mendoj që në këtë moment të garës secili nga ekipet të marrë atë që meriton. Deri të shtunën e ardhshme do të flasim përsëri, ne po vijojmë stërvitjen sikur ndeshja të ishte nesër dhe motivimi maksimal ekziston te secili prej nesh, pasi rihapim garën, por edhe vetë rikthehemi në pozita si pretendentë seriozë për elitën”, tha trajneri Mërgjyshi.
E.S./Vipsport.al/