VIDEO / Marshimi rekord i Sitit vazhdon i pandalur, tani ai i Bajernit është vetëm 2 fitore larg

Mançester Siti ka shkuar sot 15 pikë larg ndjekësit më të afërt në kreun e renditjes së kampionatit anglez, duke vazhduar serinë mbresëlënëse të fitoreve që e rendit atë ndër klubet më të mira në 5 kampionatet më të forta të Europës. Skuadra e Guardiolës mundi sot me shifrat 4-1 Ullvërhempton dhe regjistroi kështu fitoren e 21-të radhazi.

Nuk ishte një fitore e thjeshtë, si shumë të tjera, pasi Mançester Siti u zgjua në fund për të marrë tri pikët që i nevojiteshin për këtë sukses të rëndësishëm. Autogoli i Dendonker në minutat e pare u barazua nga Koadi në fillimin e pjesës së dytë të lojës dhe Ullvërhempton dukej në gjendje se mund të përballonte furinë e skuadrës së Guardiolës, por nuk ia doli të rezistonte deri në fund. Në 10 minutat e fundit ishte Gabriel Zhezus me 2 gola dhe Mahrez me një të tretë që vulosën fitoren 4-1.

Kështu, Siti shkon në kuotën e 21 fitoreve radhazi në të gjitha kompeticionet, një më pak se rekordi i Real Madrid të Karlo Ançelotit dhe 2 më pak se Bajerni i Hansi Flik që eci i pandalur duke fituar gjithçka që i dilte para në edicionin e kaluar. /vipsport.al/