VIDEO / Barcelona me përmbysje historike, siguron biletën për finalen e Kupës

Skuadra e Barcelonës ka arritur sot që me një përmbysje spektakolare të sigurojë praninë në finalen e Kupës ku dukej se do ta kishte të vështirë të shkonte pasi kishte humbur 2-0 ndeshjen e parë kundër Seviljes. Skuadra e Kuman ka reaguar dhe ka treguar forcë karakteri, duke kthyer në favorin e vet një duel shumë të komplikuar.

Dembele shënoi që në minutën e 12 golin e avantazhit dhe katalanasit u hodhën tërësisht në sulm, në kërkim të golit të dytë që do të hapte sfidën. Alba iu afrua golit të radhës, duke goditur shtyllën e portës së miqve, por rasti më i pastër për golin e radhës ishte ai që iu shfaq Okampos, pasi Sevilja fitoi një penallti që do të kishte mbyllur çështjen e kualifikimit. Okampos e fitoi, por edhe e gaboi goditjen nga pika e bardhë, me Ter Shtegen i cili gjeti krahun dhe e ndaloi goditjen.

Fernando u ndëshkua me të kuq duke lënë Seviljen me 10 lojtarë por ishin minutat e fundit dhe mendohej se skuadra andaluze do të rezistonte deri në fund. Por pikërisht në një goditje nga këndi, në minutën e 93 të takimit, Pike u tregua i aftë të dërgonte topin me kokë në rrjetë, duke çuar shifrat në 2-0 e hapur plotësisht kualifikuesen, pasi për të gjetur finalistin duheshin kohët shtesë.

Sapo filluan shtesat, Breithuejt arriti të shënonte golin e 3-0 dhe pastaj për Barcelonën gjithçka u bë shumë e thjeshtë, duke administruar qarkullimin e topit pa lejuar Seviljen të rrezikonte. Rasti më i diskutueshëm ishte ai kur e gjithë skuadra mike protestoi për një prekje topi me dorë të Lengle, por VAR sinjalizoi se nuk kishte penallti, duek tensionuar miqtë, aq sa De Jong u ndëshkua me të kuq edhe duke qenë në stol. Në fund, Barcelona me të drejtë festoi në fushë, për një përmbysje që do ta ndihmojë moralisht në pjesën e mbetur të sezonit, ku pikërisht fjala përmbysje do të jetë tema kryesore si në Ligën e Kampioneve, ashtu edhe në kampionat ku është në ndjekje të Atletikos. /vipsport.al/