Klop zëvendëson Salah, rihapen diskutimet për largimin e egjiptianit

Mohamed Salah mund ta shohë veten larg Liverpulit në fund të këtij sezoni. Zërat kanë qarkulluar prej kohësh, pasi futbollisti e di se për të interesohen emra si Barcelona, Real e Bajern, por janë shtuar pas ndeshjes së mbrëmshme kundër Çelsit, kur ai u largua nga fusha e lojës në minutën e 61 të takimit nga trajneri Jurgen Klop.

Ky ishte zëvendësimi më i hershëm pa asnjë problem fizik te Liverpuli për egjiptianin dhe ai nuk e priti aspak mirë e dukej qartësisht që ishte shumë i nervozuar në pankinë ndërsa priste fundin e ndeshjes. Jurgen Klop, pas përfundimit të sfidës e cilësoi si diçka normale e pozitive nervozizmin e një futbollisti që zëvendësohej.

Por një minutë pas këtij zëvendësimi, menaxheri i egjiptianit, Rami Isa, postoi në Twitter një mesazh me vetëm një pikë. Për tifozët kjo qartësisht nënkuptonte se këtu aventura e Salah te Liverpuli kishte prekur fundin dhe se tashmë po mendohej e ardhmja e tij. Kontrata e Salah është deri në vitin 2023 dhe sigurisht që klubi duhet të mendohet që të marrë maksimumin nga një shitje e mundshme e futbollistit i cili për një periudhë kohë krahasohej edhe me emra si Mesi e Ronaldo. /vipsport.al/