Kategoria e Parë A dhe B/ Dinamo merr kryesimin në debutimin e Ukut, fiton Lushnja dhe Egnatia

Dinamo ka marrë një fitore të rëndësishme në ditën e sotme të Kategorisë së Parë në Grupin A. Blutë mposhtën jo pa vështirësi në shtëpi, Veleçikun. Goli vendimtar i takimit erdhi vetëm në pjesën e dytë, saktësisht në minutën e 72 falë Da Silvës. Në vazhdim, Dinamo ruajti avantazhin dhe mori suksesin e parë nën drejtimin e trajnerit të ri, Olsi Uku, ndërsa tashmë kryeqytetasit janë edhe në vendin e parë të renditjes, me 26 pikë, një më shumë se Burreli ndjekës. Nga ana tjetër, po për Grupin A, Erzeni mposhti me rezultatin 2-0 Vorën. Shijakasit ngjiten në vendin e katërt me 15 pikë, ndërsa Vora mbetet në vendin e gjashtë me 11 pikë.

Ndërkohë, në Grupin B, kryesuesit e Egnatias janë rikthyer te suksesi teksa kanë mposhtur në transfertë, Flamurtarin me rezultatin 1-2. Golat për ekipin e trajnerit Gugash Magani, i realizoi Shtubina në minutën e gjashtë dhe Eler Silva në të 48-tën, ndërsa për vlonjatët vetëm në fund rrugën e rrjetës e gjeti Aliaj. Rrogozhinasit vazhdojnë kështu të qetë kryesimin me 26 pikë, ndërsa Flamurtari mbetet me shtatë pikë.

Sakaq, edhe Lushnja është rikthyer te fitorja. Lagunarët përfituan nga Elbasani dhe e mposhtën me shifrat 3-1. Tashmë, ekipi i Ilir Gjylës është ne vendin e pestë me 16 pikë, ndërsa Elbasani mbetet në kuotën e zero pikëve. Ndërkaq, në ndeshjet e tjera, Pogradeci mposhti minimalisht 1-0 Tomorin, ndërsa Besa barazoi 0-0 në transfertë me Turbinën. /VipSport.al/

Ndeshjet, Kategoria e Parë, Grupi A:

Dinamo-Veleçiku 1-0

Erzeni-Vora 2-0

Kategoria e Parë, Grupi B:

Lushnja-Elbasani 3-1

Flamurtari-Egnatia 1-2

Pogradeci-Tomori 1-0

Turbina-Besa 0-0