Sadiku e mbyll me gol turneun në Brazil, tani mendjen te Kupa Libertadores

Armando Sadiku e ka mbyllur me gol pjesëmarrjen e tij me Bolivar në një turne parapërgatitor për sezonin e ri që skuadra ka zhviiluar në Brazil. Prej dy javësh, ekipi i Bolivar gjendej në Brazil ku u ndesh edhe me Kruzeiron si pjesë e përgatitjeve para kthimit në garat zyrtare kombëtare e ndërkombëtare.

Dje, ishte ndeshja e fundit, e luajtur kundër skuadrës së kategorisë së dytë braziliane, Amerika MG, ndeshje e cila u mbyll me barazimin 1-1 dhe ku për skuadrën e Bolivar gjeti rrugën e rrjetës edhe Sadiku, i cili duket se pak nga pak ka filluar të ambientohet me klimën dhe me futbollin në Amerikën e Jugut.

Tashmë atë e presin sfida më të vështira, jo vetëm sepse do të nisë kampionati në Bolivi, por sidomos pjesëmarrja në fazën e dytë të Kupës Libertadores ku do të përballet me uruguaianët e Montevideo Uanderers. /vipsport.al/