Kapelo: Asnjë skuadër nuk ka qenë kaq në vështirësi sa Lacio përballë Bajern, ndeshje për reflektim

Ish-trajneri, Fabio Kapelo ka komentuar ndeshjen e djeshme të Champions League mes Lacios dhe Bajern Mynih. Bardhekaltërit u dorëzuan pa kushte me rezultatin 1-4, kjo edhe për faj të gabimeve të tyre në mbrojtje. Kapelo thekson se për aq sa ai e ka ndjekur Bajernin në këtë sezon, nuk kishte parë një skuadër që të ishte kaq në vështirësi sa Lacio përballë gjermanëve.

“Lacio pagoi mundësitë e pashfrytëzuara në fillim të lojës, pastaj të mos flasim për gabimet në mbrojtje. Kualitetin dhe vendosmërinë e gjermanëve e njohim, por më impresionoi fakti që kur mbrojtja e Lacios ishte në presion ia pasonte topin Reinës, dhe ai që është i zoti me këmbë, nuk arriti ta luante asnjëherë qetësisht topin.

Nga të gjitha takimet e Bajern që kam parë këtë sezon, nuk kam parë asnjë skuadër që të ishte kaq në vështirësi sa Lacio. Futbolli italian në vështirësi? Kjo ndeshje më bën të reflektoj”, u shpreh Kapelo. /VipSport.al/