Punohet edhe natën për stadiumin e ri, në Rrogozhinë, tani kanë rival edhe…kohën!

Egnatia nisi pak ditë më parë punimet për ndërtimin e stadiumit të ri, që do të jetë një nga impiantet më të mira në vendin tonë. Rrogozhinasit duket se janë në rrugë të mbarë sa i përket rikthimit në elitë, ndërsa duket se tashmë e kanë përqendruar vëmendjen edhe nga infrastruktura.

Pak ditë më parë, ata përfunduan në kohë rekord fushën stërvitore në Lekaj, e cila do t’u shërbejë, jo vetëm skuadrës së parë, por edhe tërë ekipeve të moshave, pasi drejtuesit e skuadrës rrogozhinase duan që të ngrenë akademinë duke filluar që nga sezoni i ardhshëm.

Ndonëse ekipet e moshave marin pjesë në garat zyrtare me të rinj dhe paratërinj këtë sezon, apo dhe fëmijët në kampionatet rajonale.

Por, duket se për stadiumin e ri, në Rrogozhinë po punohet edhe në orët e vona të mbrëmjes. Drejtuesit duan që të përfitojnë edhe nga rritja e temperaturave për stadiumin e ri dhe ta kenë gati që në sezonin e ardhshëm. Asgjë nuk është e pamundur, për më tepër që deri më tani, në Rrogozhinë çdo gjë ka funksionuar më së miri…