VIDEO / Perla e Pogba kthen Mançester Junajtid në krye, barazon rekordin historik të klubit

Mançester Junajtid ka qëndruar vetëm pak kohë larg kreut të renditjes në Premier Ligë, duke u kthyer aty pasi kapërceu dyshen Leister-Mançester Siti që kishin uzurpuar me radhë këtë pozicion. Ekipi i Ole Gunar Solskjaer, ka fituar 2-1 në fushën e Fullhem në një ndeshje të luftuar, falë cilësisë së lojtarëve që ka në përbërje.

Lukman i dha avantazhin Fullhemit që në minutat e parë të sfidës, duke frenuar paksa “djajtë e kuq”, por në vazhdimin e ndeshjes ishte Junajtid që diktoi ritmin. Kavani, i kthyer pas pezullimit për shprehjet raciste, barazoi shfirat që në pjesën e parë. Ndërsa në të dytën, Pogba, ndër më të mirët në fushën e lojës, gjeti rrjetën me një goditje spektakolare nga jashtë zonës, që i dha avantazhin të cilin skuadra e tij diti ta administronte mjaft mirë, edhe pse vendasit u shfaqën shpesh kërcënues.

Fitorja kthen avantazhin prej 2 pikësh të Mançester Junajtid ndaj ndjekësve më të afërt në klasifikim, ndonëse pas krahëve ka “kushërinjtë” e Sitit që kanë luajtur një ndeshje më pak e kanë mundësi konkrete për t’i parakaluar.

Gjithsesi, ky sukses ishte shumë domethënës, pasi u regjistrua ndeshja e 17 radhazi pa humbje në transfertë, duke barazuar një rekord historik që mbante ky klub që nga periudha kur drejtohej nga Aleks Ferguson./vipsport.al/