VIDEO / Mançester Siti nuk fal më, goleadë për t’u kthyer përsëri i pari

Mançester SIti nuk ndalet më. Skuadra e Pep Guardioles tashmë ka harruar problemet e fillimit të kampionatit dhe me një seri fitoresh radhazi, ka arritur që pak nga pak të gjejë ritmin e saj dhe të kthehet e vetme në kreun e renditjes, në një duel në distancë me Mançester Junajtid me të cilin po bën vazhdimisht rokadë në këto javë.

Ndeshja e sotme ndaj Uest Bromuiç i jepte mundësinë Sitit që të kapërcente përsëri rivalët historikë në renditje dhe “qytetarët” nuk gabuan asgjë në këtë duel duke hyrë në fushë në sulm që nga minuta e parë. Gyndogan, Kanselo, përsëri Gyndogan dhe Mahrez çuan rezultatin në 4-0 që në pjesën e parë ndërsa një gol i Sterling në minutën e 57 vulosi një fitore 5-0 që nuk la vend për diskutime dhe që ishte e 11-a radhazi për këtë skuadër në të gjitha turnetë ku merr pjesë.

Ndërkohë, Arsenali ka marrë një fitore shprese 3-1 në fushën e Sauthempton falë golave të Pepe, Saka dhe Lakazet. Kjo ishte një fitore që ngjiti “topçinjtë” në vendin e 8 në renditje, vetëm 5 pikë më pak se Uest Hem i cili aktualisht mban vendin e katërt në renditje. /vipsport.al/-