VIDEO/ E kishte ruajtur për ish-skuadrën e tij, Cikalleshi gjen golin e parë në kampionat edhe pse nuk mjafton

Sokol Cikalleshi ka gjetur ditën e sotme golin e parë në kampionatin elitar turk me fanellën e Koniaspor. Sulmuesi i kombëtares u tregua i saktë teksa devijoi me kokë sferën në rrjetën e Gëztepe, skuadër me të cilën Cikalleshi është aktivizuar në të kaluarën.

Një fakt që nuk e ndaloi shqiptarin të festonte, mirëpo në fund të 90 minutave, duhej të kënaqej me arritjen personale pasi ekipi i tij u mposht me rezultatin 2-3. Pas kësaj ndeshjes, Koniaspor mbetet në mesin e tabelës, ekzaktësisht në vendin e 11 me 22 pikë, po aq sa edhe Gëztepe e një pozicioni më poshtë.

Tashmë, shpresa është që 30-vjeçari të vazhdojë të mbajë ritmin e golave për të ndihmuar skuadrën edhe më shumë, e për të lartësuar emrin në elitën turke. /VipSport.al/