“Sot nuk do të ishte kampion i Premier League”, Vardi gati të bëhej menaxher i një klubi nate në Ibiza

Xhejms Vardi ishte një nga lojtarët kryesorë me të cilët Leistër ia doli të shpallej kampione në sezonin 2015-2016. Në atë vit, sulmuesi shënoi 24 gola duke marrë vëmendjen maksimale, megjithatë historia mund të ishte krejtësisht e ndryshme. Kjo sepse pas sezonit të parë me Leister, ku 34-vjeçari shënoi vetëm pesë herë, i erdhi një ofertë e cila nuk kishte të bënte me botën e futbollit.

Vardi kishte një opsion për t’u bërë menaxher i një klubi nate në Ibiza dhe në fakt, sulmuesi e ka menduar seriozisht të largohej nga sporti pasi ishte i tërhequr nga kjo ide. Këtë histori e ka zbuluar ish-shoku i tij te Leister, Ben Marshall.

“E mbaj mend kur thoshte se do të largohej, i erdhi oferta nga Ibiza për të qenë menaxher i një klubi nate dhe ishte shumë entuziast. Donte ta provonte një eksperiencë të re”, u shpreh Marshall. Mirëpo, mendjen sulmuesit arriti t’ia ndryshonte ish-trajneri i tij, Kreig Shejkspir, së bashku me të tjerë që të mos shkonte pas jetës emocionuese e cila e priste në Ibiza, por të besonte te aftësitë e tij. /VipSport.al/