Objektivi i Prishtinës në merkato, portieri vazhdon karrierën me Shkëndijen e Gjokës

Prishtina kishte një objektiv të madh në këtë merkato dhe ai ishte portieri i Shkëndijes së Tetovës, Konstandin Zahov. Gardiani i tetovarëve ishte njohur edhe me ofertën financiare të Prishtinës, megjithatë në fund ka vendosur t’i qëndrojë besnik tetovarëve të trajnerit Ernest Gjoka, që renditen në vendin e parë në kampionat dhe janë pretendetët kryesorë për të fituar titullin.

33-vjeçari ka rinovuar kontratën dhe do të jetë pjesë e Shkëndijes deri në vitin 2023, teksa lajmin e dha vetë klubi tetovar nëpërmjet faqes zyrtare në rrjetet sociale.

“Jam i lumtur që do të vazhdoj të përfaqësoj këtë fanellë ku kam arritur sukseset më të mëdha në karrierë. Shkëndija më ka dhënë shumë, por besoj se ja kam kthyer në të njëjtën mënyrë dhe vazhdimi i kontratës tregon se të dyja palët jemi të kënaqura me bashkëpunimin. I entuziazmuar shoh përpara për të tjera suksese”, ishin fjalët e Zahov. /Vipsport.al/