Nga titullar në takimin e fundit, tashmë jashtë skuadrës. Strakosha nuk grumbullohet nga Inzagi

Është një periudhë shumë e vështirë në karrierën e Tomas Strakoshës. COVID i ka prishur tmerrësisht punë portierit të kombëtares që humbi postin e titullarit te Lacio, teksa u rikthye nga minuta e parë vetëm në ndeshjen e kaluar.

Por, kur pritej që 25-vjeçari të rifitonte vazhdimësinë, ndalet sërish. Në listën e lojtarëve të grumbulluar nga ana e trajnerit Simone Inzagit për ndeshjen ndaj Parmës, mungon emri i shqiptarit. Nga ajo që mësohet në mediat italiane është se Strakosha ka probleme fizike dhe në këtë formë nuk mund të jetë i gatshëm për të kontribuar.

Tashmë, shpresohet që gardiani të mos ketë probleme serioze duke qenë se një tjetër mungesë e gjatë do të kushtonte shumë në hierarkitë e portës së Lacios, me Reinën që di të përfitojë nga situata. /VipSport.al/