Merr fund pritja, Valon Et’hemi tani është gati për Istanbulspor

Më në fund Valon Et’hemi ka mundur të hedhë firmën në kontratën që e lidh me skuadrën e Istanbulspor. Futbollist i cili në vitet e fundit shkëlqeu në Superiore me ekipin e Kukësit, është bërë pjesë e klubit turk, ku do të vazhdojë karrierën e tij.

Largimi nga Kukësi u shoqërua me probleme pasi verilindorët bllokuan transferimn e tij duke e cilësuar të parregullt dhe në shkelje të kontratës së nënshkruar mes palëve. Çështje e cila përfundoi në organet juridike të FIFA-s për shqyrtimin e kontratës që kishte mes palëve.

Ndaj edhe pse pak ditë më parë emri i Et’hemit qarkulloi në ambientet e klubit, ai ishte në pritje të lejes nga FIFA për të bërë të mundur firmën e tij pa rrezikuar sanksione, qoftë kjo edhe një leje e përkohshme. Në këtë situatë, është pritur leja dhe me sa duket ajo ka mbërritur, pasi menaxheri Ardian Aliaj i cili mundësoi transferimin, ka hedhur fotot e nënshkrimit nga Et’hemi të kontratës që e bën pjesë të klubit turk ku gjenden edhe Eduard Rroca e Kristal Abazaj. /vipsport.al/