Makthi i Agueros nuk ka fund. Sulmuesi ishte i izoluar, por në fund të tij rezulton me COVID

Serxho Aguero është duke përjetuar një nga sezonet më të vështira në karrierë, kjo për arsye se nga tetori, argjentinasi nuk e sheh fushën me sy. Argjentinasi ka bërë vetëm tre paraqitje me Mançester Sitin në këtë sezon, ndërsa më pas u dëmtua.

Por, teksa do të kthehej nga dëmtimi, Aguero zbuloi se kishte qenë në kontakt me një person, i cili më pas rezultoi i infektuar me COVID. Në këtë formë, 32-vjeçari ishte i detyruar të qëndronte në izolim dhe tashmë kishte mbërritur në ditët e fundit të karantinës.

Pep Guardiola ishte duke e pritur për të kontribuar në skuadër, megjithatë kjo do të jetë e pamundur pasi Aguero ka zbuluar se është i infektuar me virusin e rrezikshëm. Kështu, sulmuesi duhet të qëndrojë edhe për dy javë të tjera i izoluar dhe të të rezultojë sërish negative për t’u kthyer më pas të stërvitet me shokët e skuadrës. /Vipsport.al/