Ashtu si në javën e kaluar, Superiorja pëson një ndryshim orari për ditën e shtunë

Kushtet e rënduara të motit prej reshjeve të shiut që kanë prekur Shqipërinë në ditët e fundit dhe fakti se luhet pa ndriçim, ka shtyrë klubet që edhe në këtë javë sikurse edhe në atë të kaluarën, ndeshjet e planifikuara në orën 13:45, t’i nisin 15 minuta më herët, në orën 13:30.

Në këtë ndryshim, preken sfidat e ditës së shtunë ku në program për t’u luajtur janë Tirana-Kastrioti, Apolonia-Laçi dhe Skënderbeu-Partizani. Këtë ndryshim e ka bërë të ditur pak më parë klubi i Tiranës që nëpërmjet një njoftimi në faqen zyrtare ku lajmëron ndeshjen me krutanët ka publikuar edhe orarin, edhe pse në faqen zyrtare të FSHF orari nuk ka ndryshuar.

Sakaq, java e 14 e Superiores do të startojë të premten me dy ndeshjet Kukësi-Vllaznia dhe Teuta-Bylis që do të luhen në orën 18:00. /VipSport.al/