VIDEO / Kukësi kthen Vllazninë me këmbë në tokë, vjen disfata e parë për Brdariç (VIDEO)

Kukësi kthehet përsëri pretendent dhe e bën në mënyrën më të mirë të mundshme, duke mposhtur Vllazninë kryesuese në fushën e saj. Verilindorët kanë fituar me shifrat 4-2 në “Loro Boriçi” dhe i kanë shkaktuar Tomas Brdariç humbjen e parë në pankinën e kuqebluve që kanë filluar të tronditen paksa pas dy ndeshjesh ku kanë marrë vetëm 1 pikë.

Shkodranët e nisën ndeshjen mirë me një gol të Dunga që në minutat e parë të sfidës. Por më pas ata nuk administruan dot rezultatin dhe u goditën shpejt nga dy gola të Ibraimit i cili ndëshkoi çdo gabim të prapavijës kuqeblu.

Pjesa e dytë nisi me ekipin vendas që sulmoi pareshtur për të kërkuar barazimin por u përball me portierin Tafa që ndaloi çdo gjuajtje drejt katërkëndorit të tij. Nëse Tafa ishte i pakalueshëm, Zogoviç nga ana tjetër bëri një dalje të pastudiuar mirë dhe i dha mundësinë Eze që të shënonte golin e tretë.

Vllaznia bëri disa lëvizje në radhët e ekipit dhe ia doli që të shkurtonte shifrat me anë të Hoxhajt. Por ekipi humbi të gjithë ekuilibrat duke sulmuar në fund dhe u ndëshkua nga LImaj i cili vulosi fitoren 4-2 të Kukësit, që merr një fitore shumë të rëndësishme për moralin sidomos, pasi e sheh vetën sipër disa prej rivalëve kryesorë për titull. Ndërsa tani ka kureshtje të shihet se si do të reagojë Vllaznia pas kësaj humbje të pare në kampionat. /vipsport.al/

VLLAZNIA-KUKËSI 2-4
4’ Dunga, 85′ Hoxhaj / 14′, 22′ (p) Ibraimi, 75′ Eze, 90’+5′ Limaj

Vllaznia: Zogoviç, Gurishta, Adili, Imami, Imeri (84′ Ramadani), Krymi (84′ Kalaja), Jonuzi (68′ Hoxhaj), Marku, Kruja, Dunga (74′ Coba), Dilaver.
Trajner: Thomas Brdariç

Kukësi: Tafa, Dragoshi, Bytyçi, Lulaj, Demiri, Limaj, Taipi, Ibraimi (63′ Ymeri), Mateus Leiria, Gashi (58′ Kotobelli), Eze (82′ Domi).
Trajner: Rrahman Hallaçi

KV: Imami, Adili / Demiri, Dragoshi