Kolela jep dorëheqjen pas disfatës me Laçin, Apoloninë e merr përkohësisht ish-trajneri i Luftëtarit

Xhovani Kolela nuk ka mundur të durojë më shumë pas humbjes së djeshme ndaj Laçit 6-1 dhe nuk do të jetë më në krye të skuadrës së Apolonisë. Tekniku italian ka dhënë dorëheqjen e cila është pranuar nga ana drejtuesve të klubit fierak.

Në fakt, bardhejeshilët kanë pasur shumë telashe në këtë fillim të sezonit duke mos fituar ende asnjë ndeshje në pesë javët e para dhe në këtë formë, Laçi duket sikur i vuri kapakun problematikave. Kështu, me Kolelën tashmë të larguar, skuadra ka kaluar përkohësisht në drejtim të Nikolin Çoçllit i cili ka qenë pjesë e stafit teknik të fierakëve.

Çoçlli, edhe në sezonin e kaluar ka pasur eksperiencë në Superiore duke qenë se për njëfarë kohe drejtoi ekipin e Luftëtarit. Mbetet për t’u parë tashmë se cili do të jetë trajneri që do të marrë përsipër Apoloninë për të vazhduar rrugëtimin në Superiore. /VipSport.al/