Ka edhe kështu, një futbolliste e Ligës së Tretë spanjolle nuk nderon Maradonën. E cilësonte përdhunues

E gjithë bota e futbollit ka nderuar figurën e Diego Armando Maradonës, i cili para disa ditësh u nda nga jeta si pasojë e një arresti kardiak. Liga të ndryshme europiane, lojtarë të famshëm apo jo, janë bërë një duke respektuar një nga ato që futbollit i dha shumë duke inspiruar gjeneratë të tëra.

Megjithatë, ka edhe nga ato që nuk janë dakord me nderimet për Maradonën, jo për atë që ka bërë në fushë, por më shumë për jetën e tij jashtë fushës së blertë. Kështu, në një ndeshje të Ligës së Tretë në Spanjë, në futbollin e femrave, lojtarja Paula Dapena refuzoi të respektonte minutën e heshtjes në nderim të Maradonës.

Në formë proteste ajo u ul këmbëkryq, teksa i ktheu kurrizin kamerave duke shprehur mosvlerësimin ndaj legjendës. Ndërkohë, të gjitha veprimet e Dapenës vijnë si pasojë e fakti se ajo e cilësonte Maradonën një përdhunues, pedofil dhe keqtrajtues, ndaj vendosi të mos i bënte nderime figurës së tij. /VipSport.al/