Anderlehti nuk di të fitojë më, por Hasi është i bindur: Kompani, takticien fantastik

Klubi i Anderlehtit në vitet e fundit ka pësuar shumë ndryshime dhe një rënie të ndjeshme të rezultateve, aq sa e ka të vështirë që të përfshihet në luftën për titullin kampion. Afrimi i Vinsent Kompani për rolin e trajnerit-lojtar nuk ka dhënë frytet e duhura dhe tashmë ish-kapiteni i Belgjikës është vënë në diskutim nëse duhet të vazhdojë apo jo në këtë projekt.

Por një person që i ka dale në mbrojtje atij është Besnik Hasi. Ky i fundit e njeh shumë mire nga ditët kur të dy vishnin fanellën e kësaj skuadre, para se Kompani të niste rrugëtimin e suksesshëm që e bëri edhe kapiten të një klubi si Mançester Siti. Hasi është plotësisht i bindur për aftësitë e Kompani e për këtë arsye, i ka nxitur të gjithë që të vazhdojnë të besojnë te ai.

“Ëndrra e tij për t’u bërë trajner ishte shumë e madhe. Nga pikëpamje taktike ai është fantastik. Kanë qenë disa javë të vështira për Anderlehtin, por Kompani nuk dorëzohet kurrë”, ishin fjalët e Hasit, i cili drejtoi vetë Anderlehtin drejt titullit kampion. Mediat belge kanë zbuluar se kur Konpani erdhi fillimisht te Anderlehti, i kërkoi Hasit që ta shoqëronte në këtë aventurë të re. Por trajneri shqiptar e refuzoi këtë mundësi, pasi preferonte që të vazhdonte të ishte trajner i parë. /vipsport.al/