Poçetino gati për rikthimin në detyrë: E dua Premier League, por i gatshëm për oferta

Mauricio Poçetino është i papunë prej momentit kur u shkarkua nga Totenhemi, duke qenë se ky sezon ndryshe nga i mëparshmi ku preku edhe finalen e Ligës së Kampionëve, rezultoi zhgënjyes.

Mirëpo, argjentinasi nuk kërkon të qëndrojë shumë kohë pa ushtruar profesionin e tij dhe në sezonin e ardhshëm pritet të jetë sërish duke drejtuar. Poçetino e ka deklaruar hapur se dëshiron të qëndrojë dhe të trajnojë në Premier League, por së fundmi është shprehur i hapur edhe për oferta nga vende të tjera.

“Ideja ime është të vazhdoj të jetoj në Londër. E dua Premier League, por në të njëjtën kohë jam i hapur të dëgjoj oferta nga vende të tjera. Unë dhe stafi im jemi rritur së bashku dhe mund t’i ofrojmë shumë klubit tonë të ri.

A mund të marrë drejtimin e një klubi që nuk është në gjashtë të parat? Kur erdha te Totenhem, ata nuk ishin në gjashtë vendet e para. Arsenali përshembull tani për tani nuk është në gjashtëshen e parë. Kështu, duhet pritur dhe patur respekt për të gjithë klubet sepse të gjitha punojnë dhe nuk duhen nënvlerësuar”, u shpreh Poçetino. /VipSport.al/