Higuain: Lautaro te Barça? Nuk mund të thuash “jo” kur të telefonon vetë Mesi

Barcelonës i duhet një qendërsulmues dhe Mesi e ka pikasur prej kohësh pasardhësin e Suarez. Lautaro Martinez është vetëm 22 vjeç, por i ka plotësuar të gjitha kriteret për të qenë krah “Pleshtit” në sulmin e Barcelonës për sezonin e ardhshëm. Klubi katalanas po bën maksimumin për ta sjellë në “Camp Nou”, por në fund do të merret në konsideratë edhe dëshira e yllit latin.

Disa janë të mendimit se Martinez duhet të refuzojë dhe të vazhdojë të jetë ylli më i shndritshëm i Milanos “zikaltër” e të tjerë mendojnë se është gati për të bërë një hap të tillë. Në fund vendimi i përket atij dhe nuk e ka aspak të lehtë. Në lidhje me këtë çështje flet bashkëkombasi i Lautaros dhe kundërshtari direkt në Serie A, Gonzalo Higuain. Ky i fundit nuk do donte të ishte në situatën kur të telefonon Mesi dhe nuk di çfarë t’i artikulosh.

“Është një situatë e komplikuar. Për shembull, kur unë isha 18 vjeç dhe Real Madrid po më kërkonte, unë nuk u thashë ‘jo, faleminderit’. Ju nuk e dini çfarë mund të ndodhë. Natyrisht nuk dua të krijoj polemika, por është e vështirë të thuash ‘jo’ kur të do Mesi në ekip dhe të telefonon ai për të ta kërkuar këtë. Nuk do të doja të isha në situatën e tij tani.

Lautaro është në ngjitje dhe kjo është pjesa më emocionuese e karrierës së tij. Ai është pjesë e një klubi të madh si Inter, edhe pse është kaq i ri. Ka luajtur në ‘Copa America’ dhe pa asnjë dyshim që do të bëhet sulmuesi kryesor i Argjentinës. Duke e thënë këtë, gjithçka është në dorë të tij. Duhet të shohim se si reagon ndaj kritikave dhe sa i fortë është në aspektin e mentalitetit”, tregoi Higuain. /vipsport.al/

MILAN, ITALY – DECEMBER 06: Lautaro Martinez of FC Internazionale reacts during the Serie A match between FC Internazionale and AS Roma at Stadio Giuseppe Meazza on December 6, 2019 in Milan, Italy. (Photo by Emilio Andreoli/Getty Images)