Kujtimet e Hasit: Mezi mbaja lotët para ndeshjes me Greqinë. Nuk kishim ambicie, do na duhej një si De Biazi

Besnik Hasi po kalon këtë periudhë të vështirë izolimi në shtëpinë e tij në Belgjikë, pranë familjarëve, pasi edhe në Arabinë Saudite ka ndalur gjithçka si pasojë e koronavirusit. Në një lidhje me “Fan Zone” ai ka treguar pikërisht se si po jetohet kjo atmosferë e çuditshme në Belgjikë, si dhe ka kaluar disa etapa të jetës së tij si futbollist me fanellën kuqezi.

“Jam në Belgjikë. Liga vendosi që kampionati të mbyllet këtu, për shkak të situatës së vështirë. Megjithatë ky nuk është një vendim përfundimtar, pasi federata do të vendosë më vonë për këtë. Në Arabinë Saudite në këtë moment temperaturat janë mbi 33 gradë, ndërsa në verë janë mbi 40 dhe është e vështirë të luhet futboll. Janë disa hipoteza për vazhdimin e kampionatiy, por ende nuk është vendosur.

Kombëtaraja shqiptare? Për drejtimin e Kombëtares duhet të presim.

Shqipëri-Greqi? Kundërshtari vinte si kampion i Europës dhe normale që ishte ndeshje e tillë nga situata politike që ka qenë gjithnjë. Në ndeshje kemi qenë shumë të qetë, pavarësisht se presioni jashtë ka qenë i madh. Presioni më i madh ishte kur shkuam te stadiumi. Stadiumi ishte mbushur 2 orë para. Sa u futëm në fushë, aty më kapi një emocion që nuk e kisha më parë, pasi e pashë për herë të parë stadiumin aq plot. Më kapi një ndjenjë që mezi i mbajta lotët. Nuk më kishte ndodhur asnjëherë kjo. Kur filloi ndeshja ne ishim të motivuar, gjynah grekët çfarë hoqën.

Kosova me fanellë kuqezi? Është një pyetje me spec. Në jemi të gjithë shqiptarë, por tani Kosova është një shtet sovran dhe ka gjithçka të një shteti tjetër, pavarësisht se në kokat tona gjithçka është kuqezi.

Çfarë i mungonte Kombëtares atëherë? Dje kisha një telefonatë të gjatë me Fakajn. Na mungonte ambicia. FSHF ka bërë hapa shumë përpara tani. Në atë kohë sistemi i garave ishte më i vështirë se tani. Për këtë e ndjej edhe veten fajtor. Kemi pasur kualitet mjaftueshëm, por ambicia na ka munguar për të arritur suksese. Nuk e patëm një trajner si De Biazi të na fuste shpirtin e garës në grup. Ne ishim në gjendje që mposhtnim kampionin e Europës dhe më pas na mposhte Gjeorgjia”, kujtoi Hasi. /vipsport.al/