FOTO / As masat e COVID-19 nuk ndalin Kukësin, vazhdon puna në kantierin e stadiumit

As pandemia e koronavirusit që ka pushtuar gjithë botën dhe as masat e ndërmarra duke ndalur shumicën e aktiviteteve në të gjithë territorin shqiptar, nuk kanë ndalur punën për rindëritmin e stadiumit të Kukësit. Në kantierin e stadumit “Zeqir Ymeri” vazhdohet të punohet për të ngritur strukturat e impiantit, siç ka treguar vetë klubi duke postuar sot disa foto.

“Punimet në stadiumin e ri të Kukësit vijojnë, megjithëse me ritme më të ngadalta. Po punohet me orare të shkurtuara dhe staf të reduktuar duke respektuar njëkohësisht edhe rregullat për sigurinë në kuadër të masave në luftën kundër COVID-19!”, shkruhej në njoftimin e verilindorëve ku shfaqeshin edhe fotot e gjendjes aktuale të impiantit në qytetin verilindor.

Sipas planit, Kukësi shpresonte që të vinte në punë impiantin në fillimin e edicionit të ri, por me ngadalësimin e punimeve për shkak të pandemisë, nuk dihet ende se kur do të mund të përfundojë stadiumi. Duhet theksuar se deri më sot, nga qarku i Kukësit nuk kanë rezultuar persona të prekur nga koronavirusi e ndoshta kjo ka shtyrë drejtuesit e pushtetit local që të insistojnë që të vazhdojë puna në kantierin e ndërtimit të impiantit. /vipsport.al/