Rakitiç ndryshon mendje, kroati i mbyll derën ofertave nga e gjithë Europa

Ivan Rakitiç nuk ka ndër mend që të largohet nga Barcelona gjatë merkatos së janarit, edhe pse nuk i kanë munguar oferta nga klube me shumë emër në Europë e nga kampionate të njohura si Seria A apo Premier Liga. Futbollisti kroat ka ndryshuar mendje duke parë se situata e tij në muajin e fundit ka ndryshuar gjithashtu.

Pak kohë më parë ai deklaronte se i kishin hequr lumturinë për të luajtur futboll, meqë Valverde po e linte vazhdimisht në stol. Por në muajin e fundit ai ka luajtur titullar në katër ndeshje ndaj Borusias, Atletikos, Majorkës e Interit, duke qenë protagonist e shkëlqyer me lojën e tij në këto duele. Kjo ka ndryshuar edhe qasjen e klubit ndaj kroatit, ndërsa edhe ky i fundit ka bindjen se do të jetë më i aktivizuar në vijimësi.

Ndaj nga dëshira për t’u larguar në verë apo në janar, Rakitiç duket se ka vendosur që të qëndrojë të paktën deri në qershor te Barcelona. Për të ishin hapur alternativa shumë interesante me Juventus, Inter e Mançester Junajtid që kishin bërë oferta konkrete për të gjatë kësaj periudhe. Megjithatë, ai ka krijuar bindjen se do të luajë më rregullisht në pjesën e dytë të sezonit, duke u munduar të fitojë përsëri gjithçka me katalanasit siç ka bërë këto vite ndaj ofertat janë kthyer mbrapsht me një “jo” përfundimtare. /vipsport.al/