Mesazhe të frikshme në shtëpinë e Ibrahimoviç, tifozët kërcënojnë: Juda… prehu në paqe

Zlatan Ibrahimoviç ka vendosur të rikthehet në Suedi, aty ku do të ketë një rol drejtues në klubin e Hamarbit, duke qenë tashmë investitor në klub dhe bashkëpronar. Ky vendim i sulmuesit, ka lënë shumë të pakënaqur në klubin  rival të Hamarbit, te Malmo, skuadër nga e cila Ibrahimoviç u bë i famshëm.

Sikur të mos mjaftonte fakti që po investon në një klub rival, sulmuesi suedez provokoi jo pak duke thënë se tifozët e Malmos do të ishin të lumtur për të. Drejtuesi i tifozëve të Malmos, ka reaguar ashpër duke thënë: “Ai ka humbur logjikën, nuk di se çfarë thotë. Statuja e tij nuk ka më asnjë vlerë. Si të jemi të lumtur, kur kërkon të bëjë një klub më të mirë se Malmo”.

Sakaq, në shtëpinë e tij në Stokholm i kanë bërë edhe piktura në portën kryesore duke shkruar emrin e Judas, personazh ky në librat fetarë. “Juda… Prehu në Paqe”, ishin shkrimet e dedikuara sulmuesit suedez, teksa një pankartë përmbante edhe logon e klubit të Malmos. /Erjon Allaraj-VipSport.al/