Dueli në distancë me Gjimshitin, Kumbulla i detyruar për të rikuperuar nga dëmtimi

Marash Kumbulla vazhdon të mbetet jashtë skuadrës së Veronës. Mbrojtësi ka pësuar një tërheqje në ndeshjen e kampionatit italian ndaj Breshias para një muaji. Edhe pse pritej që koha e rikuperimit të ishte më e shpejtë, sërish për të mos rrezikuar asgjë, është preferuar që 19-vjeçari të mos zbresë në fushë.

Mirëpo, në ndeshjen e radhës në transfertë ndaj Atalantës së Gjimshitit, Kumbulla duhet të bëhet gati pasi ekipi i tij ka një tjetër mungesë në repartin difensiv. Vetëm kthimi i shqiptarit mund të qetësojë trajnerin Juriç, aq më tepër kur ekipi vjen pas humbjes me Romën.

Kumbulla ka qenë autor i një kampionati të shkëlqyer deri në këto momente, ndërsa ka marrë vlerësime në masë dhe gjithashtu me paraqitjet e tij ka fituar vëmendjen e klubeve të mëdha si Juventusi, Napoli apo edhe Fiorentina të cilat e kanë nën shënjestër. /Egi Çabeli-VipSport.al/