Trajneri i Peskarës jep si shembull Memushajn për të rinjtë: Luan se është kolonë, jo për moshën

Ledian Memushaj është kthyer këtë vit në një nga yjet e Serisë B. Mesfushori i Peskarës, me pasimet dhe organizimin e lojës së tij, ka bërë që tani të gjithë ta cilësojnë një lojtar i cili në fakt do të bënte më mirë që të luante në Serinë A, pasi është i një niveli superior ndaj bashkëlojtarëve të tij.

Për këtë është i ndërgjegjshëm edhe Luçiano Zauri, ish-kapiten i Lacios e tashmë trajner i Memushajt te Peskara. Ai përdor emrin e mesfushorit shqiptar si shembull për të rinjtë që duhet të fitojnë formacionin me formën e tyre.

“Pse nuk luajnë të rinjtë? Është më tepër çështje forme se sa moshe. Memushaj nuk luan se është 32 vjeç, por sepse është një kolonë e ekipit”, shpjegoi ai për “Gazetta Dello Sport” duke treguar rëndësinë që kishte futbollisti para skuadrës.

Memushaj është aktualisht njeriu-asist më i mirë në Serinë B, me 5 të tilla në këtë pjesë të parë të sezonit, duke ecur me ritme shumë më të larta se në edicionin e kaluar të cilin e mbylli me 10 asiste. /vipsport.al/