Te Luftëtari ka dy çështje, trajneri Marantas bëhet shkaktar

Luftëtari ndodhet në pozita jo fort të mira në tabelën e renditjes, e madje në zonën që bie direkt nga Superiorja në Kategorinë e Parë. Bluzinjtë arritën që të merrnin pikë ndaj Teutës në fushën e tyre, por ajo që shqetëson është situata me disa lojtarë që kanë luajtur titullarë.

Sidomos me Realdo Filin që ka qenë një nga lojtarët e spikatur, e  madje edhe kapiten, jo vetëm këtë sezon në disa ndeshje, por edhe vjet, në pjesën e dytë të sezonit kur iu bashkua bluzinjve.

Një debat në distancë me tifozët, ka bërë që Fili të pezullohet nga klubi. Por, duket se trajneri Marantas ka lënë jashtë 20-shes edhe holandezin Cerezo Hilgen. Madje, këtij të fundit ia kanë propozuar largimin, ndonëse kanë nënshkruar një kontratë në verë e cila mund të ketë kosto.

Holandezi ka kërkuar zbatimin e kontratës, ose duke qëndruar në Gjirokastër dhe të luajë, ose në raste se largohet të marrë si dëmshpërblim shumat që ka nënshkruar kur është bërë pjesë e Luftëtarit…

Në prag të ndeshjes me Flamurtarin që vlen sa një sezon, te Luftëtari situata nuk duket edhe aq e mirë, ndërsa nuk është çudi që të kemi edhe largime titullarësh…

E.S./Vipsport.al/