Ndihmësi i Rejas jep garanci për Dermakun: Lojtar për Serinë A, për ne ishte i rëndësishëm

Serxhio Porrini, krahu i djathtë i Edi Rejas në stolin e përfaqësueses shqiptare, është i bindur se Kastriot Dermaku ka gjithçka duhet për të vazhduar të luajë rregullisht me skuadrën e Parmës në Serinë A. Pakkush priste që mbrojtësi shqiptar të kishte një impakt të tillë në futbollin elitar italian pas shumë viteve të kaluar në kategoritë e ulëta.

Por Porrini e sheh atë si një futbollist të kompletuar për të luajtur në nivelet e larta. “Është padyshim gati për Serinë A. Me ne ka luajtur për herë të parë ndaj Islandës, e kishim parë që në periudhën kur luante te Kozenca se kishte cilësi të mëdha. Për ne ishte i rëndësishëm në mbrojtjen me tre lojtarë”, shpjegoi Porrini për “Radio Sportiva”.

Ai ka folur edhe për rrugëtimin e Shqipërisë, duke shpjeguar se vështirësitë e vërteta skuadra i kishte ndeshur vetëm në sfidat kundër Francës. “Nuk ishte e thjeshtë të kalonim grupin kualifikues, kishin përballë skuadra shumë të forta. Pavarësisht kësaj, kemi zhvilluar ndeshje të mira. Franca ishte ajo e cila më shumë se të tjerat na ka vënë në vështirësi”, shpjegoi ndihmësi i Rejas i cili pritet të vazhdojë pjesë e stafit kuqezi pas rinovimit. /vipsport.al/