Gafë e pabesueshme te Belgjika, një lojtar luan 10 minuta me fanellën e gabuar

Ndeshja e mbrëmshme mes Belgjikës dhe Rusisë ka dhuruar një gafë të pabesueshme për këto nivele në futbollin ndërkombëtar. Dedrik Bojata, futbollisti i Belgjikës, ka hyrë në fushën e lojës duke mbajtur veshur një fanellë që nuk ishte e tija dhe ka luajtur për disa çaste me të.

Në fillimin e pjesës së dytë, Bojata hyri në fushë duke mbajtur në shpinë fanellën me numrin 23 dhe me emrin Batshuai. Me sa duket, ai kishte ngatërruar fanellën me sulmuesin, meqë të dy janë shumë miq dhe ulen pranë në dhomat e zhveshjeve.

Ajo që bën më shumë çudi është se për rreth 10 minuta askush nuk ndërhyri dhe Bojata luajti me fanellën e Batshuai, derisa u kuptua gabimi dhe ai vrapoi drejt pankinës dhe veshi bluzën e tij me numrin 4.

Një rast i paprecedent sa i përket skuadrave elitare të futbollit botëror, që ka bërë xhiron e rrjeteve sociale e është kthyer në objekt talljesh, aq sa edhe klubi i tij, Herta Berlin, ka postuar një foto të fanellës së re që do të mbante me numrin 23 dhe emrin Batshuai. /vipsport.al/