Ekskluzive/ Limaj: Ëndrra ime është të luaj në Bundesligë, kemi lojë në rritje por duhet të konkretizojmë

Kukësi e nisi kampionatin si pretendenti kryesor për titullin kampion dhe fitorja që në javën e parë kundër Partizanit, i dha verilindorëve një petk favoriti. Megjithatë, në javët e fudnit Kukësi ka treguar luhatje të shumta dhe ka lënë shumë pikë duke humbur edhe terren në klasifikim teksa edhe dëmtimet kanë qenë të shumta.

Mesfushori Vesel Limaj është rikthimi i Kukësit për ndeshjen e radhës kundër Bylisit. Ish-mesfushori i ballshiotëve që tashmë mbron fanellën e Kukësit, në një intervistë për “VipSport.al”, u shpreh se futbollistët janë të qetë duke qenë se paraqitjet e fundit kanë bindur. Sakaq, Limaj u ndal edhe ne merkatoja e janarit dhe një largim i mundshëm të cilin për momentin shprehet se nuk e mendon.

Vesel, rezultatet e fundit nuk kanë qenë shumë bindëse te Kukësi. Çfarë po ndodh me skuadrën?
Mendoj se ekipi ka një mini-krizë e cila ka ardhur si rezultat i mungesave të shumta gjë e cila mund t’i ndodhë çdo skuadre. Por, loja ka ardhur në rritje dhe kjo gjë na bën të jemi të qetë për vazhdimësinë.

A erdhi pushimi i Kombëtareve në kohën e duhur?
Mendoj se ekipit tonë i ka ardhur në kohën e duhur sepse ne futbollistët që ishim me lëndime të lehta, jemi rikuperuar plotësisht dhe pas një kohe të gjate kemi ekipin e kompletuar.

Çfarë presim ndryshe nga Kukësi në pjesën e mbetur të këtij viti deri në janar?
E thashë dhe më lart se loja ka ardhur në rritje pavarësisht se nuk janë marrë rezultatet e dëshiruara. Ndryshimin që pres është t’i konkretizojmë rastet para portës dhe të marrim maksimumin në çdo ndeshje.

Ndeshjet e fundit munguat si shkak i një dëmtimi. Si është gjendja fizike?
Kam pasur një tërheqje muskulore e cila më ka lënë jashtë për 10 ditë dhe kam munguar në dy ndeshje. Tani kam kaluar lëndimin dhe e ndjej veten 100% të jap maksimumin në ndeshjet e mbetura.

A do të ketë një tjetër gol nga Limaj kundër ish-skuadrës?
Në çdo ndeshje futem të jap më të mirën për ekipin, pastaj normalisht goli është diçka qe secili futbollist dëshiron ta bëjë pa marrë parasysh kundërshtarin.

Është për ty një ndeshje më e veçantë apo do ta konsideroje si të tjerat?
Për mua të gjitha ndeshjet janë të veçanta sepse niveli i ligës është i përafërt dhe Kukësi futet në çdo takim për tre pikët dhe normal e konsideroj si ndeshjet tjera.

Meqenëse po afron edhe merkatoja, si janë planet e Limajt?
Për momentin jam i fokusuar të ndihmoj ekipin të paraqitet sa më mirë në kampionat dhe nuk mendoj fare për janarin.

Cili është kampionati i preferuar ku do të doje të luaje?
Të jemi realist ëndrra ime normalisht është të luaj në Bundesligën gjermane por si synim për të ardhmen janë ligat si Holanda apo Belgjika. /Erjon Allaraj-VipSport.al/