Derbi i heshtur më shumë se i Shqipërisë, Tirana dhe Vllaznia sfidohen në kryeqytet

Tirana do të presë sot në orën 18:00 në kryeqytet, Vllazninë. Në atë që quhet si derbi i Shqipërisë, dyert e stadiumit “Selman Stërmasi” do të jenë të mbyllura për shkak të incidenteve të ndodhura në sfidën me Partizanin. Edhe pse dënimi i tifozerisë së Tiranës për dy ndeshje duhej të ishte shlyer, në konsideratë nuk është marrë ndeshja e Kupës që bardheblutë zhvilluan ndaj Shënkollit, me arsyetimin se dënimi nuk futet në fuqi ditën që zyrtarizohet.

Kështu, stadiumi do të jetë i heshtur, në një nga sfidat reklamë për Kategorinë Superiore. Sa i përket takimit, të dyja ekipet kërkojnë të marrin fitoren. Tirana për të vazhduar rrugën si pretendente, ndërsa Vllaznia për të lënë pas krahëve dy disfatat e fundit. Tekniku i 24-herë kampionëve të vendit, Julian Ahmataj do të vuajë mungesën e sigurt të Erion Hoxhallarit dhe Agustin Torasës, të cilët u ndëshkuan me karton të kuq në ndeshjen e fundit ndaj Teutës.

Megjithatë, të gatshëm pritet të rikthehen Doka e Kale, ndërsa me shumë mundësi Edon Hasani do të jetë sërish jashtë për arsye dëmtimi. Ndërkohë, edhe në kampin shkodran ka rikthime të rëndësishme. Ndryshe nga sfida e fundit në kampionat, tekniku Mirsad Jonuz do të ketë të gatshëm mbrojtësin Gurishta. Sakaq, titullarë pritet të jenë edhe mesfushorët Ramadani e Hygor. Ai që nuk ia ka dalë të jetë në dispozicion të kuqebluve është Gligorov. /Egi Çabeli-VipSport.al/