VIDEO / Katastrofë kuqezi në Finlandë, kombëtarja e femrave mundet 8-1

Kombëtarja shqiptare e futbollit të femrave, ka bërë që të harrohet shpejt paraqitja mbresëlënëse që dhuroi ndaj Portugalisë pak ditë më parë në “Elbasan Arena”, pasi sot është mundur me rezultatin e thellë 8-1 në Finlandë si rrallëherë në historinë e saj.

Në fakt, një disfatë kaq e thellë nuk ndeshej që në fillimet e saj, në vitin 2014, kur mundej 11-0 nga Norvegjia e 10-1 nga Holanda. Që atëherë, vajzat kishin filluar të bënin përmirësime graduale duke treguar se edhe futbolli i femrave po vinte në rritje.

Por sot, skuadra e drejtuar nga Vioresin Sinani ka kapitulluar pa kushte që në minutat e para të sfidës. Vesterlund kaloi në avantazh finlandezet që në minutën e 2-të, e më pas në të 9-n ishte Kollanen e cila dyfishoi shifrat. Në minutat 17 dhe 19 erdhën golat e Fransi dhe Olling, ndërsa Sallstrom vulosi rezultatin 5-0 të pjesës së parë në minutën e 35-të.

Ishte pikërisht kjo e fundit që shënoi edhe tre gola të tjerë në pjesën e dytë (75’, 89’, 90’+4’) ndërsa ngushëllimi i vetëm i vajzave kuqezi ishte një goditje e Morinës e devijuar nga Kuika në portën e vet për të çuar përkohësisht shifrat në 6-1. Megjithatë, me 23 tentativa në portë të vendasve, ndaj 7 të vajzave kuqezi, rezultati 8-1 duhet të cilësohet “pozitiv” në një ndeshje që ishte interpretuar tmerrësisht gabim nga fillimi deri në fund. /vipsport.al/