VIDEO / Ekuadori pret De Biazin, Argjentina B i shënon një thes me gola

Ndërsa negociatat përmes drejtuesve të Federatës së Ekuadorit dhe trajneri Xhani De Biazi vazhdojnë prej disa javësh, përfaqësuesja e këtij vendi është mundur sot me rezultatin e thellë 6-1 nga Argjentina, e cila praktikisht sot ka luajtur me zgjedhjet e dyta, duke lënë jashtë shumë prej titullarëve.

Me emra si Dibala, Korrea, Pereira, Roho apo Taljafiko në stol, skuadra e drejtuar nga Skaloni nuk e ka pasur aspak të vështirë të triumfojë ndaj rivalëve që do të ketë përballë edhe në eliminatoret e Botërorit në zonën e Amerikës Latine.

Takimi u vendos që në pjesën e parë kur Alario, autogoli i Espinoza dhe Paredes me penallti çuan shifrat në 3-0. Mena Delgado shënoi për Ekuadorin në minutën e 49, por Pecela, Dominguez dhe Okampos shënuan edhe tre gola të tjerë, për të siguruar këtë fitore të thellë të lojtarëve të rinj të kësaj Argjentine e cila po ndërton grupin për pjesëmarrjen në Kupën e Amerikës si dhe kualifikueset e Botërorit në vitin e ardhshëm. /vipsport.al/