Rapo: Kemi lënë pikë nga mungesa e fatit, Luftëtari rikthehet më i fortë!

Në dy javët e fundit, Luftëtari ka lënë pikë të rëndësishme në fundin e ndeshjes. E madje si për koicidencë dhe fatin e keq të skuadrës bluzi, golat që u kanë hequr pikët nga duart kanë ardhur nga penalltitë në shtesë!

Ndodhi kështu me Laçin në Gjirokastër, e po kështu edhe në Korçë, në fundjavën e shkuar. Kapiteni i skuadrës së Luftëtarit, Donald Rapo, thekson se kanë qenë penallti të çuditshme, por skuadra duhet që të tregohet e fortë dhe të vlerësojë edhe minutat shtesë, aty ku jo për fajin e saj, por më shumë edhe për mungesën e fatit ka lënë pikë të rëndësishme gjatë rrugës.

Në një prononcim për “Rtshsport”, Donald Rapo ka pohuar: “Futbolli kështu e ka, ndikoi penalltia edhe në Korçë ashtu si me Laçin, që nuk di ta ndaj nëse ishte apo jo. Por, mua më vjen keq që ne po pësojmë gola në minutat e fundit nga episode të çuditshme. Kjo është e padrejtë dhe ne duhet që të jemi ndryshe. Duke filluar që nga ndeshja e radhës me Bylisin që luajmë në shtëpinë tonë.”

“Kundërshtari i radhës na gjen më të motivuar dhe të konsolidohemi, sepse kemi vetëm 5 pikë në 7 javë, janë shumë pak për synimet që ne kemi dhe duhet që të bëjmë kthesën sa më parë që të jetë e mundur”, – tha Donald Rapo, kapiteni dhe një nga pikat e forta të bluzinjve në këto vitet e fundit në Superiore, duke u shfaqur edhe si shënues

E.S./Vipsport.al/