Rakitiç mesazh Barcelonës: Dua të luaj dhe jo të shijoj detin e të bëj shëtitje në qytet

Ivan Rakitiç është përfshirë pak në formacionin titullar të Barcelonës në këtë sezon. Ndoshta, për këtë kanë ndikuar zërat e merkatos gjatë verës, ku kroati ishte pranë largimit dhe mori sinjalin nga klubi se ishte i padëshiruara. Padyshim në këtë mes ndikoi edhe transferimi i Frenki De Jong, i cili është përshtatur menjëherë në mekanizmat e katalanasve dhe duket sikur luan prej vitesh në ‘Camp Nou’. Kështu, Rakitiç ka përfunduar në një lojtar stoli, situatë e cila nuk i shkon për shtat dhe nuk i pëlqen aspak mesfushorit.

Nga grumbullimi me Kombëtaren kroate, Rakitiç i ka lëshuar një mesazh klubit se nëse gjërat nuk ndryshojnë, atëherë duhet të ulen dhe të bisedojnë pasi në Barcelonë kërkon të luaj dhe jo vetëm të shijoj detin dhe shëtitjet në qytet. “ Nuk e di se çfarë do të ndodhë. Dua të luaj për Barcelonën dhe jo vetëm të jem pjesë e skuadrës. Do të bëj maksimumin për të ndryshuar situatën në ndeshjet e ardhshme. Kam një kontratë për disa vite, dhe nuk ka vend më të mirë se Barcelona.

Dua të luaj dhe jo vetëm të shijoj detin dhe shëtitjet në qytet. Kam folur me njerëzit në klub dhe të gjithë e dinë për opsionet që kisha. Nuk ishte sekret. Akoma dua më të mirën për Barçën dhe dua të luftoj që skuadra ta shoh që jam gati në çdo kohë për të dhënë më të mirën në fushë. Por, nëse shikoj se situata nuk ndryshon, atëherë do të ulemi dhe të bisedojmë sërish me drejtuesit”, u shpreh Rakitiç.

/Egi Çabeli-VipSport.al/