Qardaku dhe Maloku kërkojnë triumfin: Përballë Kosovës detyrim fitorja, atmosfera është shumë e mirë

Para ndeshjes së datës 15 tetorit mes Shqipërisë U 21 dhe moshatarëve të Kosovës, për kuqezinjtë në konferencë për shtyp kanë folur sulmuesi Eridon Qardaku dhe mbrojtësi Leonardo Maloku. Futbollistët u shprehën në të njëjtin mendim, teksa kjo ndeshje do të luhet me synimin për t’u fituar, ndërsa ndër të tjera, lojtarët theksuan se atmosfera në skuadër është pozitive.

“ Atmosfera në skuadrën e shpresave është shumë e mirë, kushtet janë optimale.  Jemi duke u stërvitur këtu në Elbasan, jemi gati dhe të përqendruar. Së bashku me shokët e skuadrës do mundohemi të fitojmë ndeshjen e radhës ndaj Kosovës. Është një ndeshje e fortë, ne si çdo ndeshje do të mundohemi të fitojmë edhe ndaj Kosovës do të luftojmë për të fituar. Duhet të mundohemi të fitojmë, për ne si futbollistë çdo ndeshje është detyrim për tu fituar dhe këtë duhet të bëjmë”, tha Maloku.

“Skuadrës kombëtare U-21, nuk i ka munguar asgjë, për ne është detyrim fitorja, kushtet janë shumë të mira. Gjërat janë pozitive, ne po përmirësohemi në disa aspekte, edhe sipas analizës që kemi bërë më trajnerin gjatë përgatitjeve tona. Ndeshjen e radhës ndaj Kosovës duhet të bëjmë kthesën, e të shpresojmë deri në fund të eliminatoreve. Besojmë te kualifikimi se matematika na e lejon”, tha Qardaku.