Pioli u shtohet tradhtarëve e legjendave, ja kush ka drejtuar më parë edhe Interin edhe Milanin

Stefano Pioli do të emërohet sot si trajneri i ri Milanit, duke hyrë në një grup shumë të vogël trajnerësh që kanë drejtuar si kuqezinjtë, ashtu edhe rivalët e tyre zikaltër të Interit. Tekniku do të bëhet i 8-i në një listë që ka pasur shumë emra të njohur, të cilët kanë festuar trofe me të dy skuadrat.

I pari ishte në vitet ’30, hungarezi i natyralizuar si italian, Xhiovani Viola, i cili ishte trajner e lojtar te Ambroziana në sezonin 1928-29 dhe trajner i Milanit nga viti 1933, deri në vitin 1934. Pas Luftës së Dytë Botërore, në stolin e Milanit ulet Xhiuzepe Bigonjo i cili mori një vend të dytë, ndërsa në vitin 1958 drejton Interin pa shumë sukses duke u shkarkuar në mes të kampionatit.

Një tjetër emër është ai i Xhixhi Radiçe, i shkarkuar nga Milani në 1981-1982, drejtoi Interin 2 vite më vonë për 41 ndeshje. Një vend të veçantë në historinë e klubeve ka Ilario Kastanjer, i cili drejtoi Milanin në vitin që ra në Serinë B, ndërsa u akuzua si tradhtar sepse kishte arritur akordin me Interin të cilin e drejtoi një vit më vonë.

Pastaj është Xhiovani Trapatoni, trajner i Milanit në 1973-1974, duke zënë vendin e Çezare Maldinit, duke u kthyer asistent e pastaj përsëri trajner i parë. Por festën ai e bëri me Interin, atë të rekordeve të sezonit 1988-1989 që fitoi titullin. Dy të fundit sipas radhës janë Zakeroni dhe Leonardo, me të parin që festoi titullin e çudive të vitit 1999 me kuqezinjtë e brazilianin i cili u dhuroi zikaltërve trofeun e fundit, Kupën e Italisë në vitin 2011. /vipsport.al/