Kategoria e Parë/ Devolli përmbys Lushnjen dhe merr vendin e parë, përfundon ecuria perfekte e myzeqarëve

Ndeshja e fundit e kësaj jave e Kategorisë së Parë mes Devollit dhe Lushnjes është mbyllur me fitoren e vendasve me rezultatin 2-1. Skuadra e Devollit ka dëshmuar se këtë sezon do të jetë një nga ekipet pretendente për t’u ngjitur në elitë, duke mposhtur një rival të drejtpërdrejtë si myzeqarët. Lushnja vinte në këtë ndeshje si ekipi favorit, duke qenë se i kishte bërë edhe një start perfekt kampionatit duke fituar të treja ndeshjet e kampionatit.

Në fakt, u duk sikur edhe ky takim do të kishte këtë histori. Pjesa e parë u mbyll pa rrjeta të prekura, ndërsa emocionet ishin rezervuar për në fraksionin e dytë të ndeshjes. Lushnja kaloi e para në avantazh në minutën e 62 falë sulmuesit të përhershëm Mikel Canka. Megjithatë, vendasit nuk u dorëzuan dhe  13 minuta më pas rivendosën baraspeshën falë golit të Mitës.

Të besuarit e trajnerit Stavri Nica morën zemër dhe tentuan fto fitonin ndeshjen. Në fund ia dolën të triumfonin, teksa në minutën e 86 Dervishi shënoi golin që entuziazmoi të pranishmit. Në minutat e mbetura, Lushnja nuk ia doli të ndryshonte fatet e takimit duke pësuar humbjen e parë sezonale, ndërsa Devolli ngjitet në vendin e parë duke parakaluar pikërisht lushnjarët. /Egi Çabeli-VipSport.al/