Kapiteni rekordmen i Laçit i pafat, pëson dëmtim të rëndë në ndeshjen e fundit

Laçi u ndal në një tjetër barazim në javën e shtatë të Kategorisë Superiore, aty ku përballë kishte një nga skuadrat më në formë të momentit, Bylisin. Skuadra e drejtuar nga Starova, nuk po arrin të marrë këtë sezon rezultatet e pritshme duke u renditur në vendet e fundit në klasifikim.

Sikur të mos mjaftonte vetëm forma e dobët që kurbinasit po kalojnë në kampionat, tashmë Starova duhet të bëjë llogaritë edhe me një mungesë të rëndësishme. Kapiteni Eglentin Gjoni është dëmtuar ditën e djeshme gjatë ndeshjes dhe u detyrua të largohej nga stadiumi me ambulancë për një kontroll më të specializuar në spital.

Mbrojtësi i kurbinasve që sezonet e fundit ka qenë ndër të vetmit futbollistë që ka luajtur në të gjitha ndeshjet e mundshme me Laçin, ka thyer krahun dhe tashmë i duhet kohë për riaftësimin. Ai do të duhet t’i nënshtrohet një ndërhyrjeje kirurgjikale ndërkohë që te Laçi kanë nisur të luten që koha për riaftësim të jetë sa më e shkurtër. /Erjon Allaraj-VipSport.al/