Intervista për “Vipsport”, Rapo: Datëlindja më sjell fat, i shënoj Skënderbeut, si një vit më parë me Kamzën

Donald Rapo vazhdon që të jetë një nga pikat e forta të skuadrës së Luftëtarit edhe këtë sezon. Rapo është një futbollist që me eksperiencën e tij, i ka shërbyer në disa role skuadrës bluzi, që nga mbrojtja e deri në ofensivë. Rapo realizoi eurogolin me Laçin, të parin për këtë sezon, ndërsa dita e sotme ka qenë festë për të pasi ka festuar datëlindjen e 29-të.

Në një intervistë për “Vipsport”, Rapo thekson se datëlindja para ndeshjeve i ka sjell fat, pasi edhe vjet i shënoi Kamzës…

-Rapo, përpara keni Skënderbeun, si shkon Lufëtatri në këtë ndeshje?

Jemi të mobilizuar, jemi përgatitur gjatë gjithë javës dhe do të shkojmë në Korçë për të dhënë maksimumin. Të mos harrojmë, që Skënderbeu edhe pse nuk është ashtu si një vit më parë, ka emrin, por ka edhe një trajner shumë profesionistë. Ne do të shkojmë për të bërë lojën tonë dhe për të mos humbur në Korçë.

-Vazhdoni që të keni mungesa, ju penalizojnë?

E mira është që grupi të jetë i plotë, e sidomos kur luan në sfida si kjo me Skënderbeun. E megjithatë, të gjithë lojtarët që do të hyjnë në fushën e lojës do të jenë në gjendje që të bëjën më të mirën e tyre.

-Ashtu si një vit më parë, datëlindja juaj përkoi në ndeshjen me Kamzën dhe shënuat. Do e bëni edhe ndaj Skënderbeut?

Po, pse jo, kam dëshirë që të shënoj. Tashmë që gjeta golin e parë, shpresoj që të shënoj sa më shumë, madje më shumë se vitin e shkuar. Bëj shaka, e rëndësishme që të jemi në formë dhe skuadra të marrë pikë, nuk ka rëndësi shënon rap[o apo dikush tjetër. Të gjithë jemi këtu për të mirën e Luftëtarit.

-Ju kanoset rreziku i rënies nga kategoria këtë sezon apo do të synoni më shumë?

Nuk e di, është ende herët. Por, ndryshe nga vjet, mendoj se skuadra do të jetë më mirë. periudha e vështirë ka kaluar, skuadra po harmonizohet. Tashmë po prodhojmë lojë, por po marrim edhe rezultat. Kemi hedhur një hap të rëndësishëm në Kupën e Shqipërisë dhe tashmë të gjitha forcat tona janë të përqendruara në kampionat.

Intervistoi: E.Saliu/Vipsport.al/