FOTO / Rivalitet si asnjëherë në dy dekadat e fundit në Superiore. Kurrë kaq pak pikë për kryesuesen

Katër skuadra që ndajnë kreun e renditjes, tre të tjera që i ndjekin brenda 2 pikëve diferencë. Ky është bilanci i çuditshëm i Kategorisë Superiore të këtij sezoni i cili për shkak të hapave të gabuar të skuadrave pretendente, apo për meritë të ekipeve të cilat nuk i kishte llogaritur kush në garën për kreun, sheh një balancë të rrallë në kreun e tabelës së klasifikimit pas 7 javëve të para.

Kaq shumë skuadra në kryesim (4) me kaq pak pikë të regjistruara (12), është diçka që nuk ka ndodhur asnjëherë në dy dekadat e mëparshme në këtë pikë të sezonit. Në një hulumtim të Vip Sport rezulton se rasti që i afrohet më shumë është ai i sezonit 2014-2015, kur kryesonte Kukësi me 13 pikë dhe asokohe ndiqej nga Flamurtari, Tirana e Partizani me 12, Skënderbeu me 11 e Laçi me 10. Ai ka qenë një ndër kampionatet më të luftuar të Superiores, ku në fund të dy fazave të para kishte vetëm 3 pikë diferencë mes vendit të parë dhe vendit të katërt, ndërsa titullin e fitoi Skënderbeu me 10 pikë distancë nga Laçi i vendit të pestë.

Ndërkohë, ka pasur edhe kampionate të tjera ku pas 7 javësh, kishte më shumë se një skuadër në kryesim. Ka ndodhur në edicionin 2005-2006 me Besën e Elbasanin, në 2003-2004 me Partizanin dhe Teutën apo edhe në 1999-2000 me Teutën dhe Tomorin.

Vetëm në një rast në dy dekadat e kaluara, ka pasur një skuadër e cila e ka filluar në mënyrë perfekte kampionatin me 7 fitore në po aq ndeshje të luajtura. Ajo ishte Tirana e edicionit 2004-2005, e cila pikët e para i la pikërisht në javën e 8. /vipsport.al/