E zbulon pronari i Larisës: Kaçen nuk e donte trajneri, mendoi se mund të krijonte probleme

Ergys Kaçe po rezulton një nga lëvizjet më të goditura për skuadrën e AEL Larisës në kampionatin grek të futbollit, pasi bashkë me Amr Uarda, futbollistin tjetër të huazuar nga PAOK, po ndihmojnë këtë skuadër që të qëndrojë larg fundit e të ketë pretendime edhe për të arritur zonën e Europës. Por fillimisht, afrimi i dy lojtarëve nuk është parë me sy të mirë nga trajneri Mikalis Grigoruiou, i cili ishte kundër.

Vetë pronari i klubit, Aleksis Kuglas, në një intervistë të dhënë në Greqi, ka shpjeguar si ishte situata dhe se kishte qenë një fitore personale për të paraqitja e mirë e dy lojtarëve që në fillim.

“Paraqitja e Uarda dhe Kaçes me fanellën e AEL është një kënaqësi personale, pasi z. Grigoriu nuk i dëshironte. Ai mendonte se do të ishin indiferentë si lojtarë të huazuar dhe do të krijonin probleme në dhomat e zhveshjeve.

Por jo vetëm ata nuk kanë krijuar as problemin më të vogël, por në të kundërtën kanë krijuar një grup të shkëlqyer dhe për shkak se tani kemi më shumë alternativa, ka konkurrencë të madhe në ekip”, vlerësoi ai kontributin edhe jashtë fushës së lojës që jepte mesfushori shqiptar dhe ai egjiptian në radhët e ekipit të tij. /vipsport.al/