Daja zbulon dëmtimin e rëndë të Muzakës: Po rikuperojmë shumë, më mirë të fitosh në këtë mënyrë

Trajneri i Skënderbeut, Ilir Daja në prononcimin pas ndeshjes për Supersport është shprehur se mesfushori Muzaka do të mungojë për të paktën një muaj pas dëmtimit të pësuar, ndërsa shtoi se ekipi duhet të jetë me këmbë në tokë pasi nuk ka ndeshje të lehta.

“U ndje rezultati negativ ndaj Vllaznisë dhe nuk ishim të qartë. Kisha ndeshje të improvizuar dhe kaluam Ditën mbrapa. Hodha dy lojtarë që kanë prezantimin e parë si Vangjeli që e përgëzoj dhe Ndeki. Ishin rezultativ në pozicionet e tyre por kjo fitore na jep qetësi. Të gjitha këto defekte sidomos në qarkullimin e topit, kemi mundësi t’i rikuperojmë.

Kemi dëmtimin e Muzakës që është i rëndë dhe mësohet nesër por besoj se për 1 muaj nuk do ta kemi gati. Kemi edhe futbollistë që nuk mësohen me manovrën e Skënderbeut. Kemi përdorur potencialin që kishim. Kishim 3-4 sulmues me Gripshin në pozicion të ri dhe Krasniqin në krahun e majtë. Besoj se kemi kohën e duhur që të rregullojmë gjërat që në këto 7 javë ishin jo pozitive.

Jemi një Skënderbe në ndërtim pasi problemet që kishim e shohim renditjen nga poshtë lart. Duhet të jemi me këmbë në tokë pasi siç po shihet nuk ka ndeshje të lehta dhe diferenca përjashto 2-3 ekipe. Të tjerat janë që në çdo ndeshje mund të fitosh dhe në çdo të pësosh.

Goditjet në portë janë statistikë që duhen vlerësuar por dua të them që Luftëtari ishte i ngjeshur dhe me ekuilibër. Kishim mungesë iniciative nga Gripshi dhe Muzaka që nuk goditën. Më mirë të fitosh me këtë statistikë sesa të humbësh e barazosh me shumë raste.

Ekipi nuk ka dinamikë për të kaluar nga sulmi në mbrojtje por me lojtarë si Muzaka që mungojnë është problem. Do t’i jap hapësirë të rinjve”, tha Daja.