Zbulohet mashtrimi! Grizman, akord me Barçën që në mars për të fituar 14 milionë euro

Me sa duket, Atletiko Madrid ka të drejtë teksa thotë se Barcelona ka shkelur rregullat e transferimeve dhe i detyrohet këtij klubi të paktën edhe 80 milionë euro të tjera për transferimin e Antuan Grizman. Dokumentet e bërë publik së fundmi tregojnë me saktësi se sulmuesi francez dhe katalanasit kishin akordin prej muajsh dhe në mars kanë filluar diskutimet se si do të shpërndahej një bonus prej 14 milionë eurosh i siguruar nga Barcelona.

“El Mundo” ka rënë në zotërim të shkëmbimeve elektronike mes palëve që tregojnë se si ishin zhvilluar negociatat në mars, kur Grizman luftonte kundër Barcelonës për titullin kampion dhe ekipi ishte plotësisht në luftë edhe në Ligën e Kampioneve. Atëherë kishte pasur diskutime të shumta mes familjarëve që i ka si menaxherë të interesave të tij si dhe një ndërmjetësi francez. Ky i fundit ka mbetur i pakënaqur nga kuota që i ka takuar nga shifra prej 14 milionë eurosh që përfitonte Grizman dhe këtë dokumentacion ia ka dërguar edhe Atletiko Madrid.

Madrilenët nuk e kanë përfshirë këtë dokument në denoncimin që kanë bërë në Federatë pasi Barcelona pagoi vetëm 120 milionë euro, por pritet që të dorëzojnë provën e re që tregon se katalanasit kanë thyer rregulloret e transferimeve të futbollistëve. /vipsport.al/