VIDEO / Iu fikën dritat VAR-it, Gjimshiti ishte lojtari më i pafat i fundjavës në Serinë A

Berat Gjimshiti ka qenë futbollisti më i pafat i kësaj jave në Serinë A. Në ndeshjen e fituar nga Atalanta ndaj Xhenoas, ai ishte pjesëmarrës në episodin më të pafat të javës që për pak e ktheu në personazhin negativ të ditës për ekipin e tij.

Në minutën e 90, me rezultatin 1-0 për Atalantën, Kouame i Xhenoas u rrëzua në tokë në një përplasje më Gjimshitin. Gjyqtari bëri shenjë për penallti, edhe pse mbrojtësi shqiptar i shpjegoi me ngulm se nuk e kishte prekur kundërshtarin dhe kërkoi të shihej gjithçka me VAR. Problemi ishte se pamjet nuk mund të shiheshin me VAR, pasi një defekt në kabllot e energjisë, kishte lënë në terr sallën e monitorimit të kamerave në ato minuta.

Kësisoj, gjyqtari dhe personat në sallën e VAR nuk panë pamjet që do të kishin vërtetuar pafajësinë e Gjimshiti dhe u akordua penalltia e cila barazoi ndeshjen në minutën e 90. Për fatin e mirë të tij, Zapata arriti të shënonte përsëri pak çaste më vonë duke mbyllur ndeshjen me suksesin e Atalantës e duke lehtësuar mbrojtësin shqiptar. /vipsport.al/