Turneu i U15 në Shqipëri / Kosova jep spektakël, kuqezinjtë mposhten nga Estonia

Turneu i UEFA-s që po zhvillohet në Shqipëri me përfaqësueset U15, nuk ka filluar mbarë për kuqezinjtë, të cilët janë mposhtur në sfidën e tyre të parë. Skuadra e drejtuar nga Armand Dama, debutonte sot në Kamëz përballë Estonisë, në një duel që e ka dominuar por që e ka mbyllur keq.

Pasi ka shënuar e para dhe ka krijuar disa raste për shënim, Shqipëria ka pësuar gol me kundërsulm në minutat e fundit, duke bërë që 80 minutat, kohëzgjatja e ndeshjeve për këtë grupmoshë, të mbyllshin në barazim 1-1. Për të shpallur fituesin u deshën gjuajtjet e penalltive dhe atyre Estonia u tregua më e saktë duke fituar 5-4.

Ndërkohë në ndeshjen tjetër në grup, Kosova mundi pa shumë probleme Taxhikistanin, një risi në turnetë e UEFA-s e cila po mundohet të ndihmojë nëpërmjet këtyre aktiviteteve edhe vendet në zhvillim në Azi apo pjesë të tjera të globit. Dominimi i ekipit kosovar ishte i dukshëm dhe sfida u mbyll me shifrat 8-0 për të.

Takimi i radhës i kuqezinjve të vegjël do të jetë ndaj Taxhikistanit, para se të mbyllin turneun me ndeshjen kundër Kosovës. /vipsport.al/