Titullarët e Kastriotit betohen njëzëri: E mundim Besëlidhjen

Kastrioti e nisi mbarë garën duke fituar 3-2 ndaj Egnatias në sfidën e zhvilluar në fundjavën e shkuar në “Redi Maloku”. Krutanët kanë pretendime, ndonëse kalendari i ka vënë përballë ekipit të Besëlidhjes, një prej pretendentëve kryesore për Superioren këtë sezon në Grupin A.

Tre nga lojtarët titullarë të Kastriotit, kanë besim se do t’i mundin lezhjanët këtë fundjavë, madje do të marrin 3 pikët e radhës në shtëpi. Në një prononcim për “Rtshsport”, ata janë optimistë, sidomos për sfidën e radhës ku mendojnë vetëm marrjen e 3 pikëve për të konsoliduar pozitat e tyre në tabelën e renditjes…

Sulmuesi shtatlartë Spartak Ajazi, në lidhje me sfidën e radhës, duke qenë se ka qenë edhe më parë pjesë e Besëlidhjes ka pohuar: “Jemi ndërtuar si ekip për t’u ngjitur në Superiore. E nisëm mbarë në javën e parë dhe besoj e do t’ia dalim. Të gjithë kanë besim te ne lojtarët, ndaj edhe duhet që të shtrëngohemi në çdo sfidë duke marrë pikët maksimale për ta ecura Kastriotin në elitë”, – tha Ajazi.

Kurse Abaz Karakaçi, një futbollist që ka luajtur në Superiore dhe në Kategorinë e Parë, e madje edhe në Lezhë ka theksuar se: “Kastrioti është një ekip që është ndërtuar për të shkuar në Superiore. Në fushën tonë nuk diskutohen 3 pikët dhe normalisht ne po përgatitemi për të marrë 3 pikët ndaj Besëlidhjes. Nuk e vlerësojmë shumë, por as e nënvlerësojmë”.

Në fund sulmuesi pukjan i krutanëve, Taulant Marku që luan edhe sezonin e tij të katërt me Kastriotin dhe është një nga më të spikaturit ka pohuar: “Nuk kemi bërë lojën që pritej, por sigurisht që është vetëm fillimi. Skuadra nuk është konsoliduar, ka pasur edhe ndryshime gjatë verës. Ndaj Besëlidhjes luajmë një ndeshje të vështirë. Unë shpresoj dhe kam shumë besim se do të marrim 3 pikët në këtë takim shtëpie që për ne vlen shumë edhe për konsolidimin në vendet e kreut”, – tha Taulant Marku.

E.Saliu/Vipsport.al/